علاج النحافة

علاج النحافة

لازم اتأكد ان سبب النحافة غير مرضى علشان كدة هنحتاج شوية تحاليل وهى
1-     تحليل بول
2-     تحليل براز و مزرعة براز تانى يوم
3-     صورة دم كاملة عشان الانيميا
4-     تحليل غدة درقية

بعد ما تعملى التحاليل دى لوطلعت سليمة خلاص خير و لو لا قدر الله فيها حاجة هنحلها.. 
يعنى مثلا لو فى حاجة فى الغدة هتروحى لدكتور غدد صماء 
و لو فى ديدان هتاخدى طارد ديدان و تكرريه بعد اسبوعين 
و لو فى اميبا هتخدى اي دواء فيه مادة سكنيدازول
و لو فى اكل غير مهضوم يبقى فى مشكلة فى الهضم و عايزين مهضم
ولو فى انيميا على حسب نوع النيميا هيكون العلاج
وطبعا التوجه لطبيب باطنى افضل شىء مادام فى مشكلة 

طيب خلاص خلصنا التحاليل و الحمد لله طلع مفيش حاجة او كان فى حاجة و اتعالجت , نعمل ايه دلوقتى ؟ 
لازم تعرفى ان احنا هنعمل حاجت كتير مع بعض و لازم نستمر عليها و عايزاكى تعرفى انك هتتخنى يعنى هتتخنى بس اهم حاجة انى هخليكى تتخنى و جسمك مرسوم من غير ما ابوظ جسمك بالترهلات

اهم حاجة انك تنتظمى على اللى هاقوله وسيبى الباقى على ربنا

يفضل لو توزنى نفسك فى اى صيدلية على الميزان اللى بيقيس الوزن و الطول و معدل كتلة الجسم و نسبة العضلات و نسبة الدهون و ده بيبقى موجود فى الصيدليات الكبيرة و هيفيدك تعرفى توزيع جسمك عامل ازاى و كمان القياس مش غالى عندنا فى مصر ب 10 جنيه فقط و هو جهاز ضخم على فكرة مش ميزان صغير

الرياضة الرياضة الرياضة ومش اى نوع رياضة لازم رياضة تعتمد على مقاومة
والنظام ده بدون رياضة مالوش لازمة
خللى بالك ابعدى عن رياضة البطن لاننا بنعمل رياضة تتخن فمش عايزين بطن تطلع
لازم تعرفى ان اهم اسباب النحافة هو نقص الكتلة العضلية وعشان كدة لازم نكبر العضلة و ماتخافيش ده مالوش علاقة بكمال الاجسام بتاع الرجال

سيادتك هتروحى جيم انشاء لله شهر واحد و بعد كدة اشترى دامبلز حديد2 كيلو اشترى 2 (مش غالية) و اعملى التمارين فى البيت 3 مرات اسبوعيا تنسى التحمية قبل التمارين علشان جسمك يسخن والعضلة ماتوجعش ملاحظة اللي تمارس اي تدريبات توقفها وقت الدورة و خصوصا البطن و اللي ايضا تمارس الرياضة تلعب اول و ثاني يوم و تترك الرياضة اسبوع الي عشرة ايام عشان ترتاح عضلاتها و لا تصاب بالتمزق بالأربطة

هتعملى تمارين للجسم كله ماعدا البطن مهما قالولك ماتعمليش تمارين بطن وهتركزى فى التمارين على المنطقة اللى عاوزة تزوديها مثلا تمارين الصدر للكنزة من فوق و تقولى للمدربة عايزة تمارين مقاومة بالدامبلز
و تمرين القطة للكنزة من الارداف